ශ්‍රී ලංකාව සමග පැවැත්වීමට නියමිත එක්දින ක්‍රිකට් තරගාවලිය සඳහා ද ඇෆ්ගනිස්ථානය ඔවුන්ගේ ප්‍රධාන දඟ පන්දු යවන්නා වන රෂීඩ් ඛාන් ඉවත්කර තිබෙනවා.
තරගාවලිය සඳහා සහභාගි වන ඇෆ්ගනිස්ථාන සංචිතය පෙරේදා නම් කර තිබූ අතර ඒ සඳහා රෂීඩ්ගේ නම අන්තර්ගත නොවිණි. හෂ්මතුල්ලාහ් ශහීඩිගේ නායකත්වයෙන් යුත් එම සංචිතයට ක්‍රීඩකයන් 15 දෙනෙකු ඇතුළත් අතර අතිරේක ක්‍රීඩකයන් සිව් දෙනෙකු ද නම් කර තිබේ.
පිට කොන්ද ආශ්‍රිතව සිදු කෙරුණු ශල්‍යකර්මයක් නිසා පසුගිය මාස කිහිපයේදී ක්‍රිකට් පිටියෙන් ඉවත්ව සිටි රෂීඩ් ඛාන් තවමත් සම්පූර්ණයෙන්ම යථා තත්ත්වයට පත්ව නොමැති නිසා තරගාවලියට එක් නොවේ.
ඒ අනුව ඔහුගේ ස්ථානය වෙනුවෙන් මෙතෙක් එක් එක්දින ජාත්‍යන්තර තරගයක් පමණක් ක්‍රීඩා කර ඇති කායිස් අහ්මඩ් සංචිතයට නම් කර තිබේ. දෙරට අතර පැවැත්වීමට නියමිත තරග තුනකින් යුත් එක්දින තරගාවලිය ලබන 9 වැනිදා පල්ලෙකැලේ ක්‍රීඩාංගණයේ දී ආරම්භවීමට නියමිතය.
